SON DƏQİQƏ

Vetenim-Azerbaycandir.az

İsveç Azərbaycanlılarının Koordinasiya Şurası və İsveç-Azərbaycan Kültür dərnəyi ODLAR YURDU birlikdə Bahar bayramı münasibətilə 21 martda ”Yaz təravətli Bahar - Novruz bayramı” adlı məsafədən video tədbir keçirib.
Şuranın sədri İradə Əliyeva Söderberg və dərnəyin sədri, bahar qızı Sevinc Bakılı Nemətova tədbirin iştirakçılarını salamlayıb, birlik, bərabərlik, qardaşlıq, bolluq və bərəkət rəmzi olan Novruz bayramı münasibətilə hamını ürəkdən təbrik ediblər.
Tədbirdə Azərbaycandan, Amerikadan, Türkiyədən və İsveçdən həmvətənlər iştirak ediblər.
Bu gözəl bayram günündə əziz şəhidlərimizin ruhu hörmətlə anılıb, fədakar şəhid ailələrinə, igid qazilərimizə və veteranlarımıza minnətdarlıq bildirilib, işğalda qalan digər ərazilərimizə və əsirlərimizə azadlıq arzulanıb.
Bu tədbirdə Novruz bayramı ilə bağlı təbriklər, musiqilər,  bayatılar, şeirlər və bayram xatirələri birlikdə dinlənilib və Azərbaycan mahnıları birlikdə oxunulub.
Dərnəyin fəal üzvü Gülüş Nemətova tədbirin əyləncəli hissəsində Azərbaycan musiqisindən ibarət olan canlı, gözəl, şən ifaları ilə hamını şənləndirib, sevindirib və tədbirə xoş, gözəl, rəngarəng, nəğməli bayram ovqatı qatıb.
Sonda tədbirin təşkilatçıları iştirakçılara təşəkkür edib, hamı bir-birinə, Odlar Yurdu Azərbaycanımıza, xalqımıza bahar əhval-ruhiyyəsi, ovqatı, sevgi, xoşbəxtlik, sevinc, təbəssüm, bol ruzi-bərəkət, firavan həyat, əmin-amanlıq, xoş, gözəl günlər, bol-bol uğurlar arzulayıblar.
İsveçdə “Yaz təravətli Bahar - Novruz bayramı” adlı məsafədən video tədbir şən, rəngarəng, maarifləndirici və maraqlı keçib