SON DƏQİQƏ

Respublikanın Əməkdar kənd təsərrüfatı işçisi, ömrünün yarım əsrdən çoxunu Lənkəranın iqtisadi və mədəni həyatının yüksəlişinə sərf etmiş SƏADƏT TAĞIYEV dünyasını dəyişdi.
  Səadət Tağıyev uzun illər üç kəndi birləşdirən "Komsomolun 50 illiyi" çayçılıq sovxozunun rəhbəri olub. Bu sovxoz Azərbaycanda istehsal olunan  çayın 10 faizini verirdi. Sonra  Qızılağac Dövlət Qoruğunun, 1 saylı çay fabrikinin, qısa müddət Lənkəran Şəhər İcra Hakimiyyəti başçısının  birinci müavini işləyib.Hər yerdə  işgüzarlığı, prinsipiallığı, mərdanəliyi, ən başlıcası çörəkverənliyilə iz goyub, yadda qalıb.
      Gələcək zamanlarda Azərbaycan çayçılığından bəhs edən kitablarda, yazılarda Səadət Tağıyevin də adının anılacağına şübhəm yoxdur. Çünki ömrünün  neçə onilini bu nadir bitkinin inkişafına, istehsalına həsr edib.Alimliyini torpağa tətbiq edib.Elmi yazıda yox, əməldə yaradıb.
   Keşmiş SSRİ məkanının hər yerində saysız dostları vardı.İstədiyi yerdə yaşamaq imkanı olsa da, doğulduğu məkanı heç vaxt dəyişmədi.Doğulduğu məkana bala kimi bağlanaraq sadiq qaldı.Pərən-pərən salmadı ruhları. Təzə ünvan ömrün təzə səhifəsi olacaqdı.Bu isə xatirəsiz, keçmişsiz ömürdü.  Yurdsevərliyi təkcə doğulduğu kəndə sığışacaq qədər olsaydı belə,  yenə də adı zaman-zaman sayğıyla anılacaqdı.Amma onun üçün təkcə mənim kəndim anlayışı yox, bütöv AZƏRBAYCAN var idi.
       İnsan övladı doğulduğu gündən Tanrıya doğru yol gedir. Kamil insan dərk edir ki,  bu yol uzun və qısalığından asılı olmayaraq nə zamansa bitəcək, ruhlar Tanrıya qovuşacaq. Odur ki, Səadət Tağıyev  öz müdrik xarakterinə uyğun  olaraq vəsiyyətini də etmişdi. "Ey dünya! Sənin sahilinə bir qərib kimi gəldim. Sənin evində bir qonaq kimi yaşadım. Səndən bir dost kimi ayrıldım."  Biz də qurub-yaratmaqdan zövq alan, həyat eşqilə  dolu ziyalıdan dost kimi ayrıldıq. Allah rəhmət eləsin.Məkanı cənnət olsun 
     Sevda Əlibəyli
"Vətənim-Azərbaycandır.az" 
Ömrün son fotosu
Sevda Əlibəyli Səadət Tağıyev, Təyyub Rzayev və Əlimərdan Əliyev 
28 iyul 2022