SON DƏQİQƏ

Həmyerlimiz, “Vahid Rusiya” partiyasının üzvü Mayis Məmmədov Novosibirsk vilayətinin Qanunverici Məclisinin sədr müavini seçilib.

Publika.az xəbər verir ki, səsvermədə deputatların böyük əksəriyyəti onun namizədliyinin lehinə səs verib.

1965-ci il mayın 2-də Qərbi Azərbaycanın Göyçə mahalında doğulan deputat uzun illər Novosibirsk vilayətində tikinti sahəsində iş adamı kimi tanınıb və “Birinci inşaat fondu” MMC-nin baş direktorudur.

“Birinci inşaat fondu” Novosibirskin inşaat bazarında lider mövqelərdən birini tutur.

Mayis Məmmədov vilayətin ictimai həyatında fəal iştirak edir. O, Novosibirsk Dövlət Memarlıq-inşaat Universitetinin Qəyyumluq şurasının üzvüdür, “İnşaatçıların regional işgüzar klubu” qeyri-kommersiya tərəfdaşlığına rəhbərlik edir.

Mayis Məmmədov həmçinin regional ictimai təşkilat “Rus-Azərbaycan evi”nin yaradılmasının təşəbbüskarı olub.