SON DƏQİQƏ

Beynəlxalq İdman Mətbuatı Assosiasiyasının və Avropa İdman Mətbuatı İttifaqının ölkəmizdə rəsmi təmsilçisi Azərbaycan İdman Jurnalistləri Assosiasiyasının 2021-ci ilin idman yekunlarına həsr olunmuş mükafatlandırma mərasimi keçirilib. 

“Vətənim-Azərbaycandır.az” xəbər verir ki, Azərbaycan İdman Jurnalistləri Assosiasiyasının versiyasına görə 2021-ci ilin məşqçisi seçilmiş “Qarabağ”ın baş məşqçisi Qurban Qurbanov, ilin futbol xadimi seçilmiş “Qarabağ”ın direktoru Emrah Çelikel, ilin klubu seçilmiş “Qarabağ” Futbol Klubunun baş meneceri Asif Əsgərov öz mükafatlarını alıblar. 
Vətən Müharibəsi şəhidi, qəhrəman baş leytenant, “Qarabağ” klubunun azarkeşi və Qurban Qurbanovun pərəstişkarı Səid Rəşidzadənin atası Nofəl Qasımov Səiddən xatirə qalmış papaq və poqonları Qurban Qurbanova təqdim edib. 
Qurban Qurbanov koronavirusdan vəfat edən jurnalist Elnur Əşrəfoğlunun oğlu Mətin Elnuroğluna atasının əziz xatirəsinə dərin ehtiramla AİJA-nın hazırladığı özəl plaket və “Qarabağ” klubunun hədiyyələrini təqdim edib.
AİJA-nın versiyasına görə ilin futbolçusu seçilmiş “Neftçi”nin kapitanı Emin Mahmudov və ilin legioneri seçilmiş millimizin hücumçusu Mahir Emreli mükafatlarını alıblar. Hazırda Mahir Emreli Xorvatiyada olduğundan mükafat anası Elnurə Emreliyə təqdim edilib. 
AİJA-nın versiyasına görə 2021-ci ildə Avropa, dünya çempionatlarında və Olimpiya Oyunlarında qazandıqları uğurlarına görə ilin idmançısı seçilən Rafiq Hüseynov, Rafael Ağayev, Hacı Əliyev və İrina Zaretskaya mükafatlarını alıblar.
Mükafatları Azərbaycan Milli Karate Federasiyasının prezidenti Yaşar Bəşirov və Beynəlxalq dərəcəli hakim, “Şöhrət” ordenli Hicran Şərifov təqdim ediblər.
AİJA-nın versiyası üzrə ilin mətbuat katibləri Azərbaycan Futzal Federasiyasının mətbuat katibi, Vətən Müharibəsi qazisi Mahal Məmmədov, Azərbaycan Milli Antidopinq Agentliyinin mətbuat katibi Vamiq Nəsirov və "Sabah" Futbol Klubunun mətbuat katibi Elnur Həmidov Tovuz Gənclər Evinin rəhbəri Rauf Rüstəmov və 1-ci Qarabağ müharibəsi qazisi Nofəl Qasımovdan mükafatlarını alıblar.
Keçmiş idman şərhçisi, "Bal Line" şirkətinin rəhbəri Altay Əliyev xüsusi təşəkkürnamə ilə təltif edilib. Üzrlü səbəbdən tədbirdə iştirak edə bilmədiyi üçün mükafat şirkətin nümayəndəsi İlqar Axundova təqdim edilib.