SON DƏQİQƏ

VETENİM-AZERBAYCANDIR.AZ

Balakən rayonu Yeni Şərif kənd tam orta məktəbində bu təhsil ocağının adını daşıyan Birinci Qarabağ müharibəsi şəhidi Rauf Hədisovun ildönümünə həsr edilmiş tədbir və “Şəhid Rauf Hədisov adına təqaüd proqramı” qaliblərinin mükafatlandırılması mərasimi keçirilib. Tədbirdə Şəki-Zaqatala Regional Təhsil İdarəsinin rəhbər şəxsləri, Balakən rayon təhsil sektorunun əməkdaşları, kənd bələdiyyəsinin nümayəndələri, şəhid ailələrinin üzvləri, müharibə iştirakçıları, məktəbin kollektivi və qonaqlar iştirak ediblər.
Regional Təhsil İdarəsindən AZƏRTAC-ın bölgə müxbirinə bildirilib ki, tədbir iştirakçıları əvvəlcə şəhid Vüsal Omarovun övladları Yağmur və Duyğunun, həmçinin digər şagirdlərin vətənpərvərlik mövzusunda çəkdikləri rəsmlərdən ibarət sərgiyə baxıblar.
Tədbir Dövlət Himninin səsləndirilməsi ilə başlayıb, şəhidlərin xatirəsi bir dəqiqəlik sükutla yad edilib.
Şəki-Zaqatala Regional Təhsil İdarəsinin müdiri səlahiyyətlərini icra edən müdir müavini Günay Mahmudova çıxış edərək, Vətənimizin ərazi bütövlüyü uğrunda xalqımızın apardığı mübarizədən, rəşadətli Ordumuzun şərəfli döyüş yolundan söz açıb, şəhidlərin gənc nəslə nümunə olan həyatlarından bəhs edib. Bildirilib ki, Azərbaycan xalqı öz liderinin - Müzəffər Ali Baş Komandan İlham Əliyevin ətrafında sıx birləşməklə, bütün dünyaya öz gücünü, mətinliyini nümayiş etdirib, ərazi bütövlüyümüz təmin edilib.
Şəhid Rauf Hədisovun həyat yoldaşı Mesed Hədisova, Raufun döyüş yoldaşı şəhid İsmayıl Tuhumovun atası Şəmsəddin Tuhumov çıxış edərək, şəhidlərin şərəfli ömür yolunun daim təbliğ olunması və gələcək nəsillərə ötürülməsinin vacibliyini vurğulayıb, “Şəhid Rauf Hədisov adına təqaüd proqramı”nın təşkilatçılarına minnətdarlıqlarını bildiriblər.
Tədbirdə şəhid Rauf Hədisova həsr olunmuş videoçarx nümayiş etdirilib, şagirdlərin təqdimatında ədəbi-bədii kompozisiya nümayiş etdirilib.
Daha sonra “Şəhid Rauf Hədisov adına təqaüd proqramı”nın rəhbəri, qabaqcıl təhsil işçisi Tinov Bağmanov tərəfindən müsabiqənin qalibləri elan edilib. Qaliblərə pul mükafatı ilə yanaşı, üzərində şəhid Rauf Hədisovun adı olan döş nişanları da təqdim olunub.