SON DƏQİQƏ

VETENİM-AZERBAYCANDIR.AZAzərbaycan Dövlət Pedaqoji Universitetinin beynəlxalq əlaqələr üzrə prorektoru, filologiya elmləri doktoru, professor, Prezident təqaüdçüsü, tanınmış şairə Mahirə Nağıqızı ilə “Naxçıvan” Universitetində keçirilən görüşdə əvvəlcə universitetin maddi-texniki bazası və infrastrukturu ilə tanışlıq üçün infotur təşkil olunub.Qonaqlar daha sonra universitetin rektoru Anar Kazımov və ali təhsil ocağının rəhbər heyəti ilə  görüşüblər. Görüşdə qonaqlara universitetin  missiyası, gündəlik tədris prosesi, təhsil bazası, fəaliyyət istiqamətləri, eləcə də xarici ölkələrin universitetləri ilə əməkdaşlıq çərçivəsində həyata keçirilən proqramlarla bağlı ətraflı məlumat verilib. Sonra isə sevilən şairə, professor Mahirə Nağıqızı universitetin “Xatirə kitabı”na ürək sözlərini yazıb. Ardından “Naxçıvan” Universitetinin Konfrans zalında  çağdaş Azərbaycan poeziyasının sevilən şairəsi Mahirə Nağıqızı ilə görüş keçirilib, ədəbi-bədii kompozisiya təşkil edilib. Görüşdə çıxış edən “Naxçıvan” Universitetinin rektoru, dosent Anar Kazımov qonaqları salamlayaraq onları universitetdə görməkdən böyük məmnunluğunu ifadə edib. Rektor bildirib ki, Mahirə xanım zəngin elmi yaradıcılıq yoluna malikdir. “O, həm gözəl pedaqoq, həm istedadlı şairə, həm də vətənpərvər ziyalı, zəhmətkeş alimdir. Mahirə xanımın ana dilimizin tədqiqi sahəsində  coxsaylı qiymətli əsərləri vardır”- deyə bildirən rektor Anar Kazımov qeyd edib ki, çoxsaylı monoqrafiya, kitab və məqalələrin müəllifi olan Mahirə xanım “öyrədənlərin öyrədənidir”.  Eyni zamanda, Mahirə Nağıqızı  istedadlı şairə xanımlarımızdandır. Belə ki, Azərbaycan bəstəkarları tərəfindən  Mahirə xanımın müəllifi olduğu şerlərin sözlərinə 30-dan artıq mahnı bəstələnib, aşıqların ifasında 70-dən artıq mahnısı səslənib. Məhz bütün bunlara görə də zəngin yaradıcılıq irsinə malik olan Mahirə xanımın universitetimizdə qonaq olması, onun tələbələrlə görüşünün keçirilməsi gənc nəsillərin milli dəyərlər ruhunda tərbiyəsi, elinə, obasına, yurduna sevgi və məhəbbət hissinin aşılanması baxımından çox önəmlidir. Həmçinin bədii yaradıcılıqla məşğul olan tələbə və həvəskar şairlər üçün də bu görüşün təşkilini çox əhəmiyyətli hesab etmək olar.Anar Kazımov çıxışının sonunda Azərbaycan elminin, zəngin və çoxəsrlik ədəbiyyatımızın inkişafına dəyərli töhfələr verən Mahirə Nağıqızına yeni-yeni yaradıcılıq uğurları və müvəffəqiyyətlər arzulayıb.