Azərbaycanın tanınmış rəssam-modelyeri, Əməkdar incəsənət xadimi Fəxriyyə Xələfova “Azərbaycan Respublikası Prezidentinin fəxri diplomu” ilə təltif edilməsi münasibətilə təəssüratını bölüşüb.
 
F.Xələfova  müsahibəsində belə deyib:
 
“Biz - Azərbaycan Dövlət Mədəniyyət və İncəsənət Universitetində çalışan tanınmış, çox istedadlı incəsənət xadimləri ölkə başçımız, cənab Prezident İlham Əliyev tərəfindən müxtəlif fəxri adlara layiq görülmüşük. Fəxri adlar Azərbaycan Dövlət Mədəniyyət və İncəsənət Universitetinin 100 illiyi münasibətilə verilib. Qeyd edim ki, mən bu universitetdə 2005-ci ildən fəaliyyət göstərirəm. 10 il sonra dosent elmi dərəcəsinə layiq görülmüşəm. 2006-cı ildə yenə də cənab Prezident İlham Əliyev tərəfindən Əməkdar incəsənət xadimi fəxri adına layiq görülmüşəm. Düşünürəm, bu adı illərdir, incəsənətə verdiyim töhfələrə görə çox şərəflə daşıyıram. İndi isə illər boyu Azərbaycan Dövlət Mədəniyyət və İncəsənət Universitetində pedaqoji fəaliyyətimdəki nailiyyətlərimə, tələbələrimin saysız-hesabsız uğurlarına, dizayn, dəb incəsənətinin tədrisində verdiyim töhfələrə görə “Azərbaycan Respublikası Prezidentinin fəxri diplomu”na layiq görüldüm. Göstərdiyi diqqətə görə Cənab Prezidentimizə təşəkkürümü bildirirəm. Bu, gələcək yaradıcılıq fəaliyyətimiz üçün böyük stimuldur. Məhz 2023-cü ildə bu şərəfli ada layiq görüldüyümə görə özümü çox xoşbəxt hiss edirəm. Çünki 2023-cü il Azərbaycan xalqı üçün xüsusi, yaddaqalan bir ildir. Biz ərazi bütövlüyümüzü bərpa etmişik, qalib xalqıq, qalib ölkənin vətəndaşlarıyıq. Buna görə də cənab Prezidentimizə ürəkdən təşəkkürümüzü bildiririk. Ona uğurlar, cansağlığı arzulayırıq. Hər zaman Azərbaycan xalqının başının üstündə olmasını arzulayır, rica edirik və onu dəstəkləyirik!”