SON DƏQİQƏ

Gəncə şəhərinin Molla Pənah Vaqifin adını daşıyan 8 saylı orta məktəbi tədris ilinin son gününü hissiyyatlı və fəxarətli bir təşəbbüs ilə başa vurub. Məktəbin kiçik, orta, yuxarı sinif şagirdləri, məzunları, eləcə də müəllimləri şəhidlərimizin qəhrəmanlığı və qanı hesabına əldə etdiyimiz şərəfli zəfərimizi və xalqımızın həmrəyliyini vəsf edən yürüş və fləşmob keçiriblər.

Vətən torpaqlarının azadlığı uğrunda canlarından keçmiş yüzlərlə şəhidimizin portretləri ilə yürüş etdikdən sonra, uşaqlar  açıq meydanda dayanaraq, bir göz qırpımında portretləri səmaya tuşlayıb, onlardan Xarıbülbül nişanı təsvir edib, qürurla "Qarabağ Azərbaycandır!" şüarı səsləndiriblər.
Məktəbliərin bu vətənpərvərlik aksiyasının daha nizamlı və mükəmməl keçirilməsi işində onlara Gəncədə çalışan və bu kimi tədbirlərin bilicilərindən sayılan gənc rəssam Mobil Qarayev kömək edib.
"Məktəbin, məktəblilərin bu təşəbbüsünü mənə bildirəndə, böyük sevinclə, təmənnasız olaraq onun gerçəkləşdirilməsi işinə qoşuldum. Şadam ki, tədris ilinin son günlərində bu cür qürurverici tədbirin reallaşdırılmasında mənim də əməyim oldu", - deyə M.Qarayev bildirir.
"Uşaqların sevincini, şəhidlərimizin xatirəsinin ürəklərində əziz tutmasını, vətənsevərlik hisslərinin coşmasını müşahidə etmək onların müəllim və valideynlərinə çox gözəl anlar yaşadır.  Yetişən nəslimiz, gənclərimiz Vətənə ürəkdən bağlıdırlar. Odur ki, Azərbaycanımızın gələcəyi daha parlaq olacaq", - deyə məktəbin müəllimi Zinyət Süleymanova hisslərini bölüşür.
Məktəblilər və onların müəllimləri bu təşəbbüs ilə xoş bir ənənənin təməlini qoyduqlarını və bu işin hər il davam etdiriləcəyini düşünürlər.
Zakir MURADOV,
Gəncə