SON DƏQİQƏ

Azərbaycan Universitetində 2021-ci ildə yerinə yetirilmiş elmi-tədqiqat işlərinin yekunlarına həsr olunmuş hesabat iclası keçirilib.

“Vətənim-Azərbaycandır.az” xəbər verir ki, iclasda universitetin rektoru Səadət Əliyeva cari ilin məhsuldar keçdiyini bildirib və növbəti fəaliyyət dövrü üçün qarşıda duran vəzifələr haqqında məlumat verib. 
Daha sonra universitetin elmi işlər üzrə prorektoru, riyaziyyat elmləri doktoru Yusif Qasımovun hesabatı dinlənilib. Məruzədə bildirilib ki, hesabat ilində Azərbaycan Universitetində 3 beynəlxalq və 1 respublika səviyyəli elmi konfrans keçirilib. “İpək yolu” elmi jurnalının 4 nömrəsi və 1 xüsusi buraxılış nəşr edilib. Universitetin əməkdaşları 10 ölkənin 11 universiteti ilə birgə elmi-tədqiqat işləri aparıb və onların nəticəsi olaraq birgə elmi məqalələr dərc edilib. Qeyd edilib ki, hesabat ilində Azərbaycan Universitetində Ukraynanın Xarkov Milli Radioelektronika Universiteti ilə əməkdaşlığın yeni istiqaməti olaraq İnformasiya təhlükəsizliyi üzrə birgə tədris-tədqiqat laboratoriyası yaradılıb. 
Vurğulanıb ki, universitet əməkdaşlarının üç məqaləsi Web of Science (Clavirate Analytics) bazası üzrə 2021-ci ildə ən çox istinad edilən məqalə kimi bu bazada qeyd edilib. 2021-ci ildə Azərbaycan Universiteti əməkdaşlarının indekslənən jurnallarda çap edilmiş məqalələrinə belə jurnallarda 859 istinad edilib. Bütün bunların nəticəsi kimi universitetin Clavirate Analytics Agentliyinin Web of Science bazası əsasında müəyyən edilən “H” indeksi 2021-ci ildə 9-dan 19-a yüksəlib.
Sonda universitet rektorunun “Əməkdaşların elmi tədqiqat fəaliyyətinə təşviq edilməsi haqqında” əmrinə əsasən indekslənən jurnallarda çap olunmuş məqalələrin müəllifləri mükafatlandırılıb.