SON DƏQİQƏ

Şamaxı rayon Mədəniyyət Mərkəzində, rayon icra hakimiyyəti və Milli Məclisin deputatı Tamam Cəfərovanın təşəbbüsü ilə hazırlanmış "Zəfər Yolçuları" kitabının təqdimat mərasimi keçirilib.
"Vətənim-Azərbaycandır.az” xəbər verir ki, tədbirdə Şamaxı Rayon İcra Hakimiyyətinin başçısı Tahir Məmmədov, Milli Məclisin deputatı Tamam Cəfərova, şəhid ailələləri və rayon ictimaiyyətinin nümayəndələri iştirak edib.
Şəhidlərimizin əziz xatirəsi 1 dəqiqəlik sükutla yad edildikdən sonra Şamaxıdan olan şəhidlərimizin xatirəsinə həsr olunmuş kitabın təqdimat videoçarxı nümayiş olunub.
Tədbirdə çıxış edən Tahir Məmmədov vətənimizin azadlığı və müstəqilliyi uğrunda canından keçmiş şəhidlərimizin xatirəsinin xalqımız tərəfindən daim əziz tutulduğundan, dövlətimiz tərəfindən şəhid ailələrinə göstərilən diqqət və qayğıdan danışıb. İcra başçısı şəhidlərimizin adının əbədiləşdirilməsi istiqamətində görülən işlərdən geniş söhbət açmış, "Zəfər Yolçuları" kitabının da bu istiqamətdə görülmüş işlərin bir hissəsi olduğunu vurğulayıb.
Millət vəkili Tamam Cəfərova çıxışında istər Birinci, istərsə də, İkinci Qarabağ müharibələrində qəhrəmancasına şəhid olmuş həmvətənlərimizin hər bir azərbaycanlının ürəyində əbədi yaşayacağını bildirmiş, onların cəsarət, qəhrəmanlıq simvolları olduqlarını, vətən, millət qarşısında böyük işlər gördüklərini qeyd edib. Millət vəkili "Zəfər Yolçuları" kitabının yeniyetmə və gənclərin vətənpərvərlik ruhunda inkişafı üçün əhəmiyyətini bildirib.
Tədbirdə çıxış edən rayon Ağsaqqallar Şurasının sədri Mayıl Alcanov, Qafqaz Müsəlmanları İdarəsinin Şirvan bölgəsi üzrə qazisi Hacı Mərəhməd Mustafayev, şəhid valideynləri Güllü Babaşova, Rza Nəbiyev və digərləri kitabın əhəmiyyətindən danışmış, qəhrəmanlarımızın gənclərə, gələcək nəsillərə tanıdılması üçün çox böyük qəhrəmanlıq toplusu olduğunu qeyd ediblər. 
"Zəfər Yolçuları" kitabında ölkəmizin müstəqilliyi, torpaqlarımızın müdafiəsi və ərazi bütövlüyü uğrunda bugünədək Şamaxı rayonundan olan 130 şəhid haqqında geniş məlumatlar yer alıb.
Tədbirin sonunda "Zəfər Yolçuları" kitabı şəhid ailələrinə təqdim olunub.