SON DƏQİQƏ

Xalqımızın belə bir fəlsəfi deyimi var: “Niyyətin hara? mənzilin də ora”. İnsan öz xəyallarında nəyə üstünlük verirsə, həmin arzulara çatmağın da yollarını müəyyən edir, və onlara çatmaq uğrunda fədakarlıqla mübarizə aparır. Vətəninə, xalqına layiqli vətəndaş olmaq hər bir insanın özündən, aldığı ailə tərbiyəsindən asılıdır. Torpağın müqəddəsliyi isə ilk növbədə başqalarına nümunə olmaqda onun əvəzolunmaz gözəlliyi bu torpağın verdiyi barında, bərəkətindədir. Saf təbiətin bəhrəyə gətirdiyi insanlar və ondan qidalananlar qüvvətli, namuslu, istedadlı, və həyatda müdrik olurlar. 
     Respublikamızın  şimal bölgəsinin ziyalı müəllimlərindən söhbət açarkən təhsil sahəsində özünün elmi, metodiki, pedaqoji bilik səviyyəsi ilə fərqlənən əzmkar, öz üzərində müntəzəm çalışan, tədqiqatçı alim, şair, rəssam kimi böyük hörmətə malik olan  Qələmşah Seyidəhməd oğlu İdrisovdur. 
        Qələmşah İdrisov  18 iyun 1964-cü ildə doğma yurdumuzun füsünkar guşələrindən biri olan –Xaçmaz rayonunun Qıraqlı kəndində dünyaya göz açıb. Orta məktəbi yüksək qiymətlərlə  bitirdikdən sonra, 1982-ci ildə  sənədlərini ADPU-nun “Bədii qrafika” fakültəsinə verir  və həmin fakültəyə qəbul olunur.  Q.İdrisov 1983-1985-ci illərdə Rusiya Federasiyasının Xabarovsk vilayətində hərbi xidmətdə olarkən  Baykal-Amur Maqistralının tikintisində tərtibçi rəssam kimi işləmiş və uğurlu yaradıcı fəaliyyətinə görə  RSFSR Ali Soveti tərəfindən medalla  təltif edilmişdir. Qələmşah İdrisov  1988-ci ildə  Sank-Peterburq  Rəssamlıq Akademiyasında və Dövlət Ermitajda  təsviri sənət nəzəriyyəsi üzrə kurslardan keçmişdir.  1989-cu ildə  Azərbaycan Dövlət Pedaqoji Universitetini bitirən Qələmşah İdrisov   əmək fəaliyyətinə  təhsil aldığı doğma Qıraqlı kənd tam orta məktəbində başlayıb.   Bu dövrdə Dövlət Televiziyasında keçirilən  “Yurdum, yuvam məskənimsən” telemüsabiqəsində onun dərs verdiyi tələbələr bütün respublika üzrə  III yer tutmuş və “Fəxri Fərman”larla təltif edilmişlər.
     Məlum qanlı-qadalı 1992-1993-cü illərdə  o, Ə.Hüseynzadə adına  Azərbaycan  Dövlət və İncəsənət Universitetinin Quba filialında müəllim kimi fəaliyyətə başlamışdır.  Qələmşah İdrisov  2000-ci ildən bəri indiki Azərbaycan Dövlət Pedaqoji Universitetinin Quba filialında  müəllim, metodist, kafedra müdiri, direktor müavini vəzifələrində çalışmış, hazırda pedaqoji fakültənin  dekanı vəzifəsini şərəflə icra edir. 
     Qələmşah müəllim elmi-tədqiqat işləri   ilə məşqul olmuş, 2002-ci ildə dissertant olduğu AMEA-nın Nəsimi adına Dilçilik İnstitutunda  “Dilçilik nəzəriyyəsi” üzrə namizədlik dissertasiyasının müdafiəsinə  buraxılmış,  2007-ci ildə isə  Bakı Dövlət Universitetinin  Elmi Şurasında  professor Nərgiz Paşayevanın rəhbərliyi ilə   namizədlik dissertasiyasını  müdafiə  edərək  filologiya elmləri üzrə fəlsəfə doktoru  alimlik dərəcəsinə  layiq görülmüşdür. 
     Qələmşah müəllim daim axtarışda, yazıb yaratmaqdadır. O, bir alim kimi  həmişə ortalıqa yeni nəsə qoymaq eşqi ilə çalışır.  Respublikanın  müxtəlif qəzet və jurnallarında  100-dən çox  elmi, metodiki, publisistik məqalələri işıq üzü görüb. 
     Qələmşah müəllim “Ürəyimi açıram” (şeirlər)-2006, “Qıraqlı toponimi və qıraqlılar”-2008, “Azərbaycan dilində təsviri sənət terminləri”-2010, “Xaçmaz toponimləri”-2011, “Yurd sevgisi”-2013,  “Professor Qəzənfər Kazımov və Azərbaycan dilçiliyi”-2014, “Toponimika”- 2019, “Zəfər çələngi” (şeirlər)- 2021, kimi  8 kitab müəllifidir. 
     Qələmşah müəllimin  “Toponimika” kitabında ali məktəblərdə tədris olunan “Toponimika” fənni üzrə proqram materiallarını əhatə edən mövzularla yanaşı, bu sahədə aparılan son toponimik tədqiqatlara  da geniş yer ayrılmışdır.
    “Zəfər çələngi” (şerlər)  kitabı isə Müzəffər Ali Baş Komandanın  rəhbərliyi altında  qalib Azərbaycan Ordusunun  II Qarabağ müharibəsindəki  şanlı qələbəsinin  poetik ifadəsidir.  Kitabdakı şeirlərdə  Tovuz döyüşlərindən başlamış böyük qələbəyə qədər yol gələn qəhrəman oğullarımızın- şəhid və qazilərimizin  bədii obrazları yaradılmaqla bərabər  Vətən, torpaq, yurd sevgisi  də öz  poetik ifadəsini tapmışdır.  Müəllifin dövlət və dövlətçiliyə  məhəbbət hissi  şeirlərinin əsas xəttini təşkil edir.  “Zəfər çələngi” (şerlər)  kitabı böyüyən nəslin  vətənpərvərlik tərbiyəsində  və qəhrəman oğullarımızın  şəxsi nümunəsi ruhunda  tərbiyə olunmasında  böyük əhəmiyyətə malikdir. 
        Qələmşah İdrisov  elmi, publisistik və ədəbi yaradıcılığına görə “Qızıl Qələm”,  “Səməd Vurqun”, “Araz” ali ədəbi mükafatlarına layiq görülmüşdür.  Şair A.A.Bakıxanov tərəfindən bünövrəsi qoyulmuş “Gülüstan” elmi-ədəbi məclisinin, Azərbaycan Jurnalistlər Birliyinin üzvüdür.
      30 il eyni tədris müəsisəsində  tədrisin keyfiyyətinin yüksəldilməsi,  pedaqoji prosesin ahəngdar təşkilində  səriştəlilik  nümayiş etdirməsində  zəngin təcrübəyə  malik olan  Qəlıəmşah müəllim   sözün həqiqi mənasıbda  sağlam kollektivin  bərqərar olunmasında da böyük  rol oynamışdır.  ADPU-nun Quba filialının direktoru  dosent Yusif Alıyev çoxsaylı dəlillərlə fikrini əsaslandıraraq dedi:                                           Qələmşah müəllimin əməyinin, filialın  səmərəli fəaliyyətində  mühüm rolu olmuşdur.  Bu indi də davam edir. Elə bilirəm ki, məndən əvvəlki direktorların da  bu nəcib insan haqqında   fikirləri vaxtında öyrənilsəydi, dediklərimlə üst-üstə düşəcəkdi. 30 il müddətində filialda təhsil alan və bu tədris ocağını  bitirən  bütün tələbələr Qələmşah  müəllimin mənəvi övladlarıdır.  Belə xoş ehtiram, səmimi münasibəti hər kəs qazana bilmir. Filialımızda müəllim adına çox böyük hörmət vardır.  Bu cəhətdən Qələmşah müəllimin adının daha iftixarla çəkilməsi bütünlükdə pedaqoji kollektivin onun şəxsiyyətinə olan dərin ehtiramının nəticəsidir. Bütün bunların hamısını o, illərlə, qram-qram qazanmışdır. Filalın direktoru  kimi onun təhsilin məzmununun  həyata keçirilməsi, dərslərin təşkilinə nəzarət, metodik rəhbərlik,  təlim və tərbiyənin  keyfiyyətinə nəzarət kimi funksiyalarının  uğurla həyata  keçirilməsindən  həmişə razılıqımı ifadə etmişəm.
     ADPU-nun Quba filialının tədris şöbəsinin müdiri  Mələk Bağırovanın da fikirlərinin  hamıya maraqlı olacaqına inanaraq dəyişiklik etmədən çatdırmağı həmmüəllif olaraq vacib bildik: “Qələmşah  müəllim xeyirxah insan, yaxın dost, sirdaş, eləcə də öz işini, sənətini fanatcasına sevən, biliyini, təcrübəsini sevimli həmkarları ilə paylaşan  gözəl pedaqoqdur. O, bizim kollektivin  günəşi, odu, hərarətidir, günəşsiz hava ürəksıxıcı olduğu kimi  Qələmşah  müəllimsiz də filialımız darıxdırıcı olur, nəsə çatışmır.
       Qələmşah  müəllimin adı çəkiləndə dərhal göz önünə şərəfli, ləyaqətli  bir ömür yaşayan əsil azərbaycanlı oğlunun  portreti çanlanır.  şərəfli ömrünün, pedaqoji fəaliyyətinin  30 ilini doğma  təhsil ocağımızda gənc nəslin təlim-tərbiyəsinə sərf edən  böyük bir pedaqoji kollektivin  qayğı və tələblərinə həssaslıqla cavab verən Qələmşah  müəllimin pedaqoji sahədə təcrübəsi  son dərəcə zəngindir.  Mən arzu edirəm ki,  nə qədər gözündə nur,  canında təpər, ulu yaradanın verdiyi tükənməz  enerji var,  şərəfli müəllim ömrünü, idarəçilik funksiyasını  möhkəm qoruyub saxlasın . Bu nəcib yolda  ona möhkəm can sağlığı, yeni-yeni nailiyyətlər arzu edirəm”. 
    Ulu Öndərimiz  Heydər Əliyev  müəllim əməyini  yüksək  qiymətləndirərək demişdir: “Mən yer üzündə müəllimdən yüksək ad tanımıram”.  Hər birimizdə müəllimin hərarətli qəlbinin bir zərrəciyi vardır. Məhz müəllim doğma yurdumuzu  sevməyi, hamının rifahı naminə  vicdanla işləməyi, müdrikliklə  və səbrlə  bizə öyrətmiş və öyrədir”.
    Belə müəllimlərdən  biri də uğurlarından  inamla söz açdığımız Qələmşah İdrisovdur. Biz ona geniş, dərin və zəngin pedaqoji düşüncə sahibi olan bir insana uzun ömür, səmərəli yaradıcılıq uğurları və sağlam həyat arzulayır,  doğum günün mübarək olsun deyirik.                  Şıxəmməd  Seyidməmmədov ADPU Quba filialının “Təbiət fənnləri və onun Tədrisi metodikası” kafedrasının baş müəllimi,    Azərbaycan Yazıçılar Birliyi və Jurnalistlər Birliklərinin üzvü.
                                                                              
Nəhayət Şirinova                                   
ADPU Quba filialının  əməkdaşı.                                                           
Azərbaycan Jurnalistlər Birliyinin üzvü.                                                     
İctimaiyyətçi, yazar.