SON DƏQİQƏ

Hər birimizin cəmiyyətdə görmək istəmədiyimiz bir çox problemlər var. Ya biz bu problemlərin çıxış yolunu həqiqətən tapa bilmirik, ya da görməzdən gəlirik. Mənim görmək istəmədiyim problem isə bəzi məmurların özbaşınalıq edərək qazi, şəhid ailələri və müharibə veteranlarına göstərdikləri laqeydlik, biganəlikdir.

Doğrudur, Vətən  uğrunda canından keçmiş şəhid ailələrinə, eləcə də qazilərə dövlət tərəfindən qayğı göstərilsə də, bir çox hallarda bəzi özbaşınalıq edən kiçik məmurlar öz davranışları ilə dövləti sanki xalqın gözündən salmağa çalışırlar.

Şübhəsiz ki, bu və ya bu kimi problemlərin mövcudluğu barədə mediada dəfələrlə yazılara rast gəlmişik. Elə Vətən savaşı bitdikdən sonra bir qazimimiz Lənkəran rayonunun İcra başçısından ona köməklik göstərməsini istəmişdir. Hətta qazimiz atasının da, I Qarabağ müharibəsində şəhid olduğunu bildirmişdi. Təəssüf ki, İcra başçısı o zaman qazimizin bu sözlərinə məhəl qoymadan qeyri-etik ifadələrlə ona, “atanın ağlı olsaydı müharibəyə getməzdi”, – deyərək təhqir etmişdir.

Hamımız bilirik ki, Vətən savaşında iştirak etmiş bir çox qəhrəman oğullarımız müharibədə mənəvi-psixoloji zədələr alıblar. Çünki onların gözləri önündə döyüş yoldaşları, dostları, əziz bildikləri komandirləri şəhid olublar. Bəlkə də elə bu səbəbdəndir ki, qazilərimizin bir neçəsi şikayətlərinə baxılmadığı və ya onlara laqeyid yanaşıldığından çıxış yolunu canlarına qəsd edərək, intihar etməkdə gördülər. Axı, nədən Vətən üçün canlarını əsirgəməyən oğullara belə – laqeyid münasibət göstərilməlidir?!

Məgər, yurd-yuvalarından zorən didərgin düşmüş insanların, ümumilikdə isə Azərbaycan xalqının 30 illlik Qarabağ həsrətinə onlar son qoymadılarmı? Məgər, onlar Vətənimizi erməni qəsbkarlarının işğalından azad etməklə, həm də bizi xalq olaraq 30 illik xəcalət hissindən xilas etmədilərmi? Budurmu bizim onlara verdiyimiz qiymət, dəyər, etdiyimiz minnərdarlıq? Axı, onlar idi 44 günlük Vətən müharibəsində sinələrini gülləyə sipər edənlər, nə tez unutduq?

Bax, budur mənim cəmiyyətimizdə görmək istəmədiklərim – laqeyidlik, biganəlik, soyuqluq və sözsüz ki, ozbaşınalıq!

 

Vəfa Abdullayeva, VETENİM – AZƏRBAYCANDIR. AZ- ın əməkdaşı 


vetenim-azerbaycandir.az