SON DƏQİQƏ

ABŞ Prezidenti Co Baydenin erməni "soyqırımı " ifadəsini işlətməsi tarixi səhv olmaqla yanaşı, gələcəkdə, ABŞ kimi böyük bir dövlətin siyasi cəhətdən çox böyük bir səhvə yol verdiyi sübut olunacaq.
 
Vetenim-Azerbaycandir.az xəbər verir ki, bu sözləri Milli Məclisin deputatı Kamilə Əliyeva deyib.
 
Deputat bildirib ki, Türkiyə Cümhuriyyətinin Prezidenti cənab Rəcəb Teyyub Ərdoğan dəfələrlə Amerika və Ermənistana müraciət edərək bildirmişdir ki, arxivlərimizi sizin tarixçi alimlərinizin üzünə açırıq, buyurub gəlib araşdırma aparsınlar. Lakin bu çağırışa reaksiya verilmədi. Çünki, bilirdilər ki, arxiv sənədləri ilə tanış olsalar görəcəklər ki, soyqırıma məruz qalan ermənilər deyil, əksinə 1918- ci ildə ermənilər azərbaycanlı və Osmanlı türklərinə qarşı soyqırım törədiblər. Bunu həm Co Bayden, həm də erməni "soyqırımı"nı tanıyan bir sıra Avropa dövlətlərinin liderləri də yaxşı bilirlər. Co Bayden onun hakimiyyətə gəlməsində erməni lobbisinin böyük dəstəyi və maliyyə yardımı müqavilində onlara verdiyi vədi yerinə yetirdi. İkinci bir tərəfdən bu gün Türkiyə təkcə regionda deyil, bütün dünyada güclü və aparıcı bir dövlətə çevrilmişdir. Türkiyə NATO da hərbi gücünə görə ikinci dövlətdir, eyni zamanda Türkiyə dünyada balanslaşdırılmış bir siyasət aparır. Bu da bəzi dövlətlərin xoşuna gəlmir, Türkiyənin iqtisadi, siyasi, hərbi cəhətdən güclənməsinə qısqanclıqla yanaşırlar. 
 
Co Baydenin bu müraciəti Cənubi Qafqaz regionunda yaranmış stabilliyin pozulmasına da gətirib çıxara bilər. Bildiyimiz kimi Ermənistanda Nikol Paşınyanı Amerikada fəaliyyət göstərən Sorus Fondu hakimiyyətə gətirmişdir. Ermənistanda bu ilin iyun ayında parlament seçkiləri keçirilməsi nəzərdə tutulur. Bu ölkədə hakimiyyətə gəlmək istəyən qüvvələr, xüsusilə revanşist düşüncəli insanlar, Co Baydenin bu fikirlərindən ruhlanaraq, istər Azərbaycana, istərsə də Türkiyəyə qarşı təxribatlar törədə bilərlər.
 
Ermənistan da onlara havadarlıq etmək istəyən dövlətlər də bilməlidilər ki, Azərbaycanla Türkiyə dost, qardaş olmaqla yanaşı, bir millət iki dövlətdir. Azərbaycanın istər sevincli, istərsə də kədərli günündə Türkiyə hər zaman Azərbaycanın yanında olmuş və ona dəstək göstərmişdir. Bu gün Azərbaycan dövləti də, Azərbaycan xalqı da Türkiyənin yanındadır və istənilən hər bir dəstəyi göstərməyə hazırdır.