SON DƏQİQƏ

    Son günlər Azərbaycan-Rusiya münasibətlərində çox kritik dönəm yaşanır. Rusiya sülhməramlılarının öhdəliklərini yerinə yetirməməsi, Qarabağ ərazisinə silahlı ermənilərin daşınmasına və yeni mövqelər qurulmasına göz yumması, Azərbaycan ictimaiyyətini qəzəbləndirib. Azərbaycan Müdafiə Nazirliyi də haqlı olaraq Rusiya tərəfinə irad tutaraq, öhdəliklərin düzgün yerinə yetirilməsini tələb edib.  
        Digər tərəfdən, Rusiyanın Liberal Demokratlar Partiyasının sədri, qalmaqallı və ermənipərəst mövqeyi ilə tanınan Vladimir Jirinovskinin Azərbaycan prezidenti və dövlətçiliyi əleyhinə təhqiramiz və hədə dolu bəyanatlar səsləndirib. Azərbaycan XİN-i də Rusiya tərəfinə nota verərək, qonşu ölkəni Jirinovskinin “ipini çəkməyə” çağırıb.
    Jirinovskinin bəyanatından təxminən 10 gün sonra böyük Azərbaycan şairi Bəxtiyar Vahabzadənin oğlu, sabiq səfir İsfəndiyar Vahabzadə heç də doğru olmayan tərzdə Jirnovskiyə cavab verdi. İ. Vahabzadə rus xalqı və rus dövlətini sərt formada tənqid və hətta təhqir edib. Azərbaycan ictimaiyyəti də haqlı olaraq keçmiş səfirə etiraz edib.
    Bir məqam da maraqlıdır ki, Azərbaycan tərəfi Vahabzadənin təhqirinin geniş yayılmasının qarşısını almağa çalışsa da, Rusiya tərəfi Jirinovskinin təhqirlərinin qarşısını almır. Hətta RLDP liderinə federal kanallar vasitəsilə imkan yaradılır.  
    Bəs İsfəndiyar Vahabzadə nədən belə bir sərt və təhqiramiz bəyanatla çıxış edib? Özünün tolerantlığı, digər millətlər və dinlərə qarşı nümunəvi dözümlülüyü ilə məşhur olan Azərbaycan xalqının bir parçası olan keçmiş səfiri təhqirə keçməyə nə vadar edib?
    Bu sualla tanınmış vəkil, Rusiyada fəaliyyət göstərən və Rusiya vətəndaşı olan azərbaycanlı Elman Paşayevə müraciət etdik.
    “Sanki ermənilər Rusiya xalqının taleyini müəyyən edir”
    - Elman müəllim, siyasi proseslərdə aktiv iştirak etmiş bir azərbaycanlı kimi, həmyerlimiz kimi bu vəziyyəti necə qiymətləndirirsiniz? Rusiya KİV-i nədən Azərbaycana qarşı ən kəskin mövqe tutub?
    - Bilirsiniz, mənim iki vətənim var. Biri həddindən artıq sevdiyim Azərbaycan, digəri isə hazırda işlədiyim və yaşadığım Rusiyadır. Azərbaycana və Rusiyaya toxunan istənilən məsələ mənim üçün də ağrılıdır. Amma hazırda iki dövlət arasındakı münasibətlərdə böyük problem var. Azərbaycan kimi Rusiya da çoxmillətli ölkədir. Təəssüflər olsun ki, Rusiyada əksər tanınmış, hətta dövlət KİV-ində çox sayda erməni mütəxəssislər, jurnalist və aparıcılar və ya ermənilərin maraqlarına xidmət edən, onların istəklərini yerinə yetirən şəxslər çalışır. Onlar səhərdən-axşama kimi Rusiya-Türkiyə, Rusiya-Azərbaycan münasibətlərini necə korlaya biləcəklərini üzərində düşünürlər. Vladimir Solovyov kimi şəxslərin verilişi də daxil olmaqla bütün kanallar Azərbaycan və Türkiyə barədə danışır. Və sanki ermənilər Rusiya xalqının taleyini müəyyən edir. Amma bu haqqı onlara heç kim verməyib.
    Rusiyadakı bəzi qüvvələr Rusiya-Azərbaycan münasibətlərinin pozulmasına çalışırlar. Rusiya Federasiyası ərazisində ermənilər istər azərbaycanlıya məxsus olsun, istərsə də türkə, istənilən nalayiq və ya xoşagəlməz fikirdən əleyhimizə faydalanmağa çalışırlar”.
    
     

    Jirinovski niyə məsuliyyətə cəlb edilmir?

    - Gələk son baş verən hadisələrə. Jirinovskinin təhqiri və Vahabzadənin ona ağır cavabı...
    - Əgər Jirinovskinin və hörmətli səfirin sözlərinə toxunsaq... Yeri gəlmişkən, keçmiş fövqəladə və səlahiyyətli səfir olmur, onlara bu status ömürlük verilir. Mən hörmətli səfirin sözlərinə çox tənqidi yanaşıram. Son dərəcə tənqidi yanaşıram. Çünki heç kimə hansısa milləti təhqir etmək haqqı verilməyib. Onun da belə bir hüququ yoxdur. Heç bir əhəmiyyəti də yoxdur – o rusdur, azərbaycanlıdır, yəhudidir, ermənidir... Heç kimin milləti təhqir etmək hüququ yoxdur. Azərbaycanın dahi şairi Bəxtiyar Vahabzadənin oğlunun söylədikləri də yolverilməzdir.
    Amma Jirinovski azərbaycanlılar deyəndə, təhqir edəndə, Azərbaycan ərazisində yaşayan rus vətəndaşları da təhqir edib. Niyə onları heç kim müdafiə etmədi? Harada idi həmin deputatlar?
    
     
    Rus milləti böyük millətdir. Rusiyada təqribən 83-dən çox millət yaşayır və Rusiya hökuməti milliyətindən asılı olmayaraq öz vətəndaşlarının maraqlarını müdafiə etməyə borcludur. Ancaq nə üçün 10 il bundan öncə Jirinovski azərbaycanlıları təhqir edəndə, qoyun adlandıranda, hamı susurdu? Mən də azərbaycanlıyam! Niyə Rusiyanın heç bir kanalı, nə Solovyov, nə digər federal kanallar, nə də parlament heç nə demədi?! Deyə bilərlər ki, Jirinovski deputatdır, toxunulmazlığı var, ona heç nə etmək olmaz... Belə deyil! Rusiya parlamentində deputatların çıxışları ilə bağlı komissiya fəaliyyət göstərir. Məhz bu komissiya deputatların çıxışlarını izləyir, onlara qiymət verir. Mən yenə deyirəm, azərbaycanlıyam və bununla fəxr edirəm. Nə üçün Jirinovskini məsuliyyətə cəlb etmədilər? Nə üçün heç kim reaksiya vermədi? Zamanında V. Jirinovski Azərbaycan xalqını təhqir etdi. Bu gün də İsfəndiyar Vahabzadə bu təhqiri onun özünə qaytardı. Nə əkmisənsə, onu da biçirsən. Belə bir məqam var. Küçədə 2 nəfər dalaşanda, biri təhqir edir. İkincisi də dərhal ona təhqirlə cavab verərək, onu daha ağır şəkildə təhqir edir. İndi də həmin vəziyyətdir. Niyə Jirinovskiyə icazə verirlər ki, bütöv xalqı təhqir etsin? Kim ona bu haqqı verib?
    Elə bilirsiniz Jirinovski öz millətini sevir? Jirinovski heç rus da deyil. Mən isə bütün çıxışlarımda, burada və xaricdə fəxrlə deyirəm ki, mənim tarixi vətənim Azərbaycandır, həm də Qərbi Azərbaycandır, hansı ki, dəlicəsinə sevirəm. Əgər millətimdən imtina etsəm, hansı dəyərdən danışmaq olar, kim olaram mən? Jirinovskiyə elə də fikir vermək lazım deyil. Vahabzadə onu dəqiq yerinə otuzdurdu. Amma təəssüf ki, rus millətinə toxundu. Təbii ki, Jirinovskinin cavabı çoxdan verilməli idi, amma bu şəkildə yox, millətə toxunmadan. 
    

    “Rusiyalı diplomatlar və deputatlar fəxrlə deyir ki, İlham bizimkidir”

    - Jirinovskinin hər addımda təhqirə yol verməsi, azərbaycanlılara qarşı çıxmasının kökündə nə durur?
    - Tezliklə Rusiyada parlament seçkiləri keçiriləcək. Mən Jirinovskini şəxsən tanıyıram. O, kim olmasından asılı olmayaraq, çox savadlı siyasətçi və mütəxəssisdir. Ancaq əxlaq və ləyaqət olmayanda təkcə səs saylarını qazanmaq üçün o hər şeyə gedəcək. Rusiyada erməni lobbisi çox güclüdür. Jirinovskiyə səs lazımdır. Bunun üçün də hər yola əl atır.
    Putin Qərb jurnalistlərinə dediyi kimi, onlarda rəis demədiyi müddətdə heç kim heç nə yazmaz. Rusiyada da belədir, rəis deməsə, heç kim heç nə deməz. Ona görə də deməzdim ki, Jirnovski özbaşına qərar verərək Azərbaycanı hədəfə alan açıqlamalar verir.
    Çox təəssüf ki, Rusiya vətəndaşı olduğum üçün Azərbaycanın daxili işlərinə qarışmaq hüququm yoxdur. Jirinovski Azərbaycan Prezidentinin ünvanına xoşagəlməz fikirlər səsləndirəndə rusiyalı diplomatlar və deputatlar fəxrlə deyir ki, İlham Əliyev bizimkidir, Moskva Dövlət Beynəlxalq Münasibətlər İnstitutunu bitirib. Bəs indi nə oldu?
    
    
    
    FOTO/VİDEO: Samir Sadıxov