SON DƏQİQƏ

Ötən il noyabrın 27-də Bakının Nizami rayonu, M.Abbasov küçəsi 13 ünvanında 8 yaşlı Fərəh Vahid qızı Nadirova yaşadığı binanın 13-cü mərtəbəsindən düşüb. Azyaşlı aldığı xəsarətlərdən hadisə yerində vəfat edib. Hadisənin üstündən 1 ilə yaxın vaxt keçsə də, Fərəhin anası hələ də  istintaqın gedişindən narazıdır. 
“Qafqazinfo”ya müraciət edən ana Dilarə Bağıyeva hadisə baş verən gün və ondan öncə həyat yoldaşı Vahid Nadirovun onu və qızı Fərəhi dəfələrlə döydüyünü, ölümlə hədələyini iddia edir. Onun iddiasına görə, sərxoş ata azyaşlı qızını döyəndən sonra onu pəncərədən atıb.
Şikayətçi nə uşağın ölümü, nə də özünün döyülməsi ilə bağlı bağlı açılan cinayət işlərindən razıdır: “Mən və övladım Fərəh Vahid Nadirov tərəfindən işgəncəyə, zorakılığa məruz qalmışıq. O, hər gün sərxoş halda evə gələrək məni uşağımın qarşısında vəhşicəsinə döyüb xəsarətlər yetirirdi. Tibbi ekspertizadan da keçmişəm, əlimdə rəylər, fakt və sübutlar var. Məni döydüyü zaman qızım araya girirdi, zərbələrə o da məruz qalırdı. Bəzən də onu qəsdən  təpiklə vururdu. Hər dəfə məni döyəndə öldürəcəyi ilə təhdid edirdi. Fərəhin ölümü ilə bağlı Nizami Rayon Prokurorluğunda cinayət işi açılıb və heç bir sübut, heç bir dəlil olmadan ölümü intihara bağlayıblar. Mən tələb edirəm ki, balama qarşı olan zorakılığın, həyatına olan qəsdin üstü açılsın...”
D. Bağıyeva deyir ki, 8 ay apardığı araşdırmalar, analizlər uşağın intiharı ilə bağlı heç bir əsas olmadığını göstərir: “İntihar etmək üçün uşaq pəncərəni açmalı idi. Pəncərədə əl izləri yoxdur. Uşağın pəncərədən özünü atması ilə bağlı hal şahidi yoxdur. Amma qızımın atası tərəfindən pəncərədən aşağı atılmasını görən bir şəxs – 11-ci mərtəbədə yaşayan S. Gülalıyeva adlı qadın var. O, görən kimi dərhal 102 xidmətinə zəng edib. Lakin ona təzyiqlər göstərilib deyə 3 fərqli ifadə verib”.
Şikayətçinin sözlərinə görə, onun Baş Prokurorluğa müraciətlərindən sonra Nizami Rayon Prokurorluğunu tərəfindən verilən qərarlar ləğv olunub, Baş Prokurorluq faktla bağlı yenidən cinayət işi açıb: “Mən hazırda cinayət işinin 125-ci maddə ilə açılmasından narazıyam. Əslində cinayət işi 120-ci maddə ilə açılmalı idi. Burada özünü öldürmədən çox həyatına qəsd etmək faktları var. Əldə olan faktlar uşağın həyatına qəsd edildiyini göstərir”.
D. Bağıyeva eyni zamanda döyülməsi ilə bağlı Nizami Rayon Məhkəməsində açılan cinayət işindən də şikayətçidir. O bildirir ki, bu ilin mart ayında döyülmə işi rayon məhkəməsinə göndərilib, 4 aydır iş getsə də, tamamlanmayıb, təxirə salınır və ortada nəticə yoxdur. Şikayətçi iddia edir ki, keçmiş həyat yoldaşı və ailəsi müxtəlif yollarla prokurorluğun işinə təsir edir. D. Bağıyeva həyat yoldaşı ilə 10 il evli olduğunu, bu müddət ərzində 3 dəfə ayrılmaq istədiyini deyib. Lakin hər dəfə V. Nadirov spirtli içki içməyəcəyinə söz verdiyindən boşanmaları alınmayıb. Yalnız Fərəhin faciəli ölümündən sonra – fevral ayında rəsmən boşana biliblər. 
Şikayətlə bağlı Respublika Baş Prokurorluğuna sorğu ünvanladıq. “Qafqazinfo”nun sorğusuna cavab olaraq təsdiqlənib ki, 27 noyabr 2020-ci il tarixdə paytaxtın Nizami rayonunda 2012-ci il təvəllüdlü Nadirova Fərəh Vahid qızının yaşadıqları evin pəncərəsindən özünü ataraq intihar etməsi faktı üzrə Nizami rayon prokurorluğunda araşdırma aparılaraq 15 aprel 2021-ci il tarixdə cinayət işi başlanılmasının rədd edilməsi barədə qərar qəbul edilib:
“Mərhum Fərəh Nadirovanın anası Dilarə Bağıyevanın araşdırmanın səthi aparılması ilə bağlı Azərbaycan Baş Prokurorluğuna daxil olmuş müraciəti əsasında qeyd edilən fakt üzrə toplanmış material Baş Prokurorluq tərəfindən tələb edilərək öyrənilib. Həmin qərar 23 iyul 2021-ci il tarixdə ləğv edilməklə Cinayət Məcəlləsinin 125-ci maddəsi ilə cinayət işinin başlanılması barədə qərar qəbul edilib. Bildiririk ki, Fərəh Nadirovanın intihar etməsi faktı ilə bağlı bütün xüsusatlar hərtərəfli, tam və obyektiv araşdırılmaqla qanuni qərarın qəbul edilməsi təmin ediləcək”.
Qeyd edək ki, qərarda göstərilir ki, Nizami Rayon Prokurorluğunun müstəntiqi Elvin Şahmirzəli tərəfindən Cinayət Məcəlləsinin 125-ci maddəsi ilə başladılan istintaqın tam və hərtərəfli aparılmadığı nəzərə alınaraq prokurorluğun 15 aprel tarixli qərarı ləğv edilib. Cinayət işi üzrə ibtidai istintaqın aparılması Bakı şəhəri, Nizami rayon prokurorluğunun müstəntiqi Şahin Məmmədova həvalə edilib. 
Dilarə Bağıyeva döyülməsi ilə bağlı fotoları da redaksiyamıza göndərib. Onların bəzisini təqdim edirik: