SON DƏQİQƏ

VETENİM-AZERBAYCANDIR.AZ

​​​​Azərbaycanın dünya birliyindəki nüfuzu getdikcə yüksəlir, əlaqələri genişlənir. Ölkəmizin mötəbər beynəlxalq təşkilatlarla fəal əməkdaşlığı, bəzi hallarda bir sıra nüfuzlu qurumlara sədrlik etməsi və qarşıya qoyduğu vəzifələri layiqincə yerinə yetirməsi beynəlxalq aləmdə yüksək dəyərləndirilir. Vətən müharibəsində qazandığımız şanlı Qələbə respublikamızın reytinqini daha da artırdı. Dünya ictimaiyyəti də şahid oldu ki, 30 il ərzində qüdrətli dövlətlərin və nüfuzlu beynəlxalq təşkilatların həll edə bilmədikləri problemi Prezident İlham Əliyevin rəhbərliyi ilə müzəffər Ordumuz 44 gün ərzində icra etdi. Bu tarixi Qələbə Azərbaycanın xarici siyasətinin növbəti uğuru oldu.

Cari ilin 20 iyul tarixində Azərbaycanın mədəniyyət mərkəzi Şuşa yenidən dünya ictimaiyyətinə qucaq açdı. Azərbaycanın tarixi mədəniyyət mərkəzi, Qarabağımızın baş tacı olan Şuşa “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumuna ev sahibliyi etdi. Forumda 50 ölkədən 150-dən çox xarici qonağın, o cümlədən 30-a yaxın ölkənin informasiya agentliyi, 3 beynəlxalq təşkilat və 82 media qurumu iştirak etdi.

Prezident İlham Əliyev Forum vasitəsilə Şuşadan növbəti dəfə dünyaya önəmli mesajlar verərək mühüm məsələlərə toxundu. Dövlətimizin başçısının çıxışı Cənubi Qafqaz regionunda baş verən tarixi transformasiya proseslərindən, Azərbaycan haqqında beynəlxalq mediada yayılan yanlış məlumatlardan və Azərbaycanın qlobal siyasətdəki mövqeyindən bəhs edirdi.

Dövlətimizin başçısı çıxışında qeyd etdi ki, Cənubi Qafqaz regionunda tarixi transformasiya prosesləri baş verir. Ənənəvi ittifaqlar zəifləyib və yeni əməkdaşlıq formatları meydana gəlib. Bu, region xalqlarının təhlükəsizlik hissini gücləndirir və münaqişələrin keçmişdə qaldığını göstərir. Qarabağ və Şərqi Zəngəzurda aparılan bərpa işləri ilə bağlı nikbinlik ifadə edən Prezident Azərbaycan cəmiyyətinin bu işlərə həvəslə yanaşdığını bildirdi.

Azərbaycan haqqında beynəlxalq mediada yayılan məlumatların həqiqətə uyğun olmadığını qeyd edən Prezident İlham Əliyev ölkəmizin uzun illər bu dezinformasiyanın qurbanı olduğunu vurğuladı. Ermənistan və Azərbaycan arasındakı münaqişə dövründə erməni diasporunun və ermənipərəst siyasətçilərin Azərbaycana qarşı hücumlar etdiyini və yanlış narrativlər yaydığını bildirdi. Bu vəziyyətin nəticəsində Azərbaycan dünya ictimaiyyəti tərəfindən təcavüzkar kimi təqdim edilib və beynəlxalq sanksiyalara məruz qalıb.

Prezident İlham Əliyev ABŞ-ın 1992-ci ildə Azərbaycana qarşı sanksiyalar tətbiq etdiyini və bu sanksiyaların absurd bir vəziyyət yaratdığını bildirdi. Azərbaycanın humanitar böhranla üzləşdiyi, bir milyon qaçqını olduğu və işğal edilmiş ərazilərinin dağıdıldığı halda, sanksiyalara məruz qalması böyük ədalətsizlik kimi qiymətləndirildi. Bu sanksiyalar ABŞ Konqresinin ermənipərəst nümayəndələrinin səyləri nəticəsində tətbiq edilib.

Dövlətimizin başçısı çıxışında medianın rolunu tənqid edərək, ABŞ Prezidenti Trampın da “Vaşinqton Post” və “Nyu-York Tayms”ı yalan xəbər mənbəyi adlandırdığını xatırlatdı. Bu gün ABŞ Prezidenti də media hücumlarının və ictimai rəyin manipulyasiyasının qurbanı olur. Azərbaycanın isə obyektiv şəkildə işıqlandırılması vacibdir və siyasi dairələrdə reallığın üzə çıxması ilə Azərbaycan bərabər tərəfdaş kimi qəbul olunur.

Şimal-Cənub Nəqliyyat Dəhlizinin əhəmiyyətini vurğulayan Prezident İlham Əliyev Azərbaycanın bu dəhlizin buraxılış imkanlarının genişləndirilməsi üçün danışıqlar apardığını bildirdi. Azərbaycanın regionda və beynəlxalq arenada obyektiv şəkildə işıqlandırılması və əməkdaşlıq imkanlarının genişləndirilməsi üçün səylər göstərdiyini vurğuladı.

Azərbaycanın neft və qazla zəngin olmasının onun günahı olmadığını vurğulayan dövlət başçısı iqtisadiyyatın şaxələndirilməsi, işsizliyin öhdəsindən gəlinməsi və yoxsulluğun azaldılması istiqamətində atılan addımların əhəmiyyətini qeyd etdi. Ədalətli yanaşma və qazıntı yanacaq növlərindən əldə edilən gəlirlərin ədalətli paylanmasının vacibliyini vurğuladı.

Azərbaycanın Avropa İttifaqı dövlətləri ilə strateji tərəfdaşlıq bəyannamələri imzaladığını və İslam Əməkdaşlıq Təşkilatının üzvü olduğunu qeyd edən dövlətimizin başçısı neft hasil edən ölkələrlə fəal əməkdaşlıq etdiyini bildirdi. Azərbaycanın kolonializmdən əziyyət çəkən xalqları dəstəklədiyini və onların səsini eşitdirməyə çalışdığını vurğuladı.

Prezident İlham Əliyevin çıxışında Cənubi Qafqaz regionunda baş verən tarixi dəyişikliklər, beynəlxalq mediada yayılan yanlış məlumatlar və Azərbaycanın qlobal siyasətdəki mövqeyi haqqında bir çox məsələlərə aydınlıq gətirdi.

Fidan HÜSEYNOVA,
YAP Quba rayon təşkilatının sədri