SON DƏQİQƏ

VETENİM-AZERBAYCANDIR.AZ

Qadın...Bu adın daxilində çox gizli xəzinələr, çox dərin mənalar yatır.Qadın dünyada zərif, incə və bir o qədər də güclü, əzmli varlıqdır.Bu cinsin nümayəndələri zəif deyillər.Gəlin, düşünək.Qadın fədakarlıq simvoludur.Qadın anadır.O, ana ki, bütün varlığıyla ömrü boyu övladları, sevdikləri üçün can yandırır, əlindən gələni, hətta bəzən gəlməyəni də edir.Belə bir obraz, belə bir əvəzolunmaz varlıq axı necə zəif ola bilər? Əsla, bu mümkün deyil.İnsanın formalaşmasında təbiət qadına çox məsuliyyət, ağırlıq yükləyib.Qadınlar bu yükü qaldıra biləcək qədər güclüdürlər.Qadın xoşbəxt olmağa layiqdir, o bu bədəli axı sonuna qədər, ömrü boyu ödəyir.
Və bir də tənha qadınlar var.O qadınlar ki, heç bir dəstək qəbul etmədən, təkbaşına, məğrur şəkildə ağır, iztirablı həyat yollarında addımlayırlar.Hər nə qədər büdrəsələr, bəzən yıxılsalar belə yenidən güc toplayır, həyat mücadilələrinə davam edirlər.Elə bu an Ramiq Muxtarın tənha qadınlardan bəhs edən misraları yada düşür;
Gözləri tavandan asılı qalar,
Hər sözdən ürəyi boşalar, dolar.
Gündüzlə gecənin yerin səhv salar,
Təkliklə çarpışar tənha qadınlar.
Qorxar ürəyini aça bir kəsə,
İstəməz sirrini bilə bir kimsə.
İsmətin qoruyar, o girməz bəhsə,
Təkliklə çarpışar tənha qadınlar.
Odlu bir baxışdan qəlbi su içər,
Könlündən min istək, min arzu keçər.
Yuxuda hər axşam o, gəlin köçər,
Təkliklə çarpışar tənha qadınlar.
Xəyalı dolanar ötən illərdə
Axtarar bəxtini axan sellərdə.
Dünyaya təzədən gəlsələr bir də,
Təkliklə çarpışar tənha qadınlar.
Cəmiyyətimizdə qadın olmaq onsuz da çətindir.Bir də bu çətinliyə tənhalıq yüklənəndə tənha bir qadının başına gələ biləcəkləri düşünmək elə də çətin olmur.Belə qadınları həyat onsuz da özünün çətin üzləri ilə sınayır.El qınağı, əsassız şayiələr onlardan yan keçmir.Təkliyi ilə mübarizə aparan qadın çəkinər hamıdan.Axı o, bilir ki, atdığı hər addım onun haqqında yanlış düşüncələrə səbəb olar.Belə bir cəmiyyətdə yaşadığımızı düşünmək belə acı verir insana.Axı niyə insanlar qınamağı bu qədər rahat bacarırlar? Niyə yıxılana balta vurmaq adətimizə çevrilib? Bu qədər mi aciz, bu qədər mi amansızıq? Gəlin, təkcə tənha qadınlara deyil, bütün qadınlara dəstək olaq.Bu müqəddəs ada layiq insanları, bu cinsin zərif, güclü, məğrur nümayəndələrini təzyiqə məruz qoymayaq.Hüseyn Cavidin dediyi kimi; “Qadın gülərsə, şu ıssız mühitimiz güləcək, sürüklənən bəşəriyyət qadınla yüksələcək!”
Vətənimizin mərd qadınları, qarşılarına çıxan maneələri məğrurluqla aşan əsl qəhrəman xanımlarımız sevməyə, sevilməyə layiqdirlər.Onlar tənhalığa, bədbəxtliyə məhkum olmamalıdırlar.Sonda fikirlərimi Aygün Xəlilqızının bu misralarıyla bitirirəm;
Sabahlara ümidli,
Məğrur, onurlu qadın.
Sənə nələr yaraşmır
Ey incə ruhlu qadın...

Samirə Qurbanova
VETENİM-AZERBAYCANDIR.AZ