SON DƏQİQƏ

“AS Group” şirkəti işğaldan azad edilmiş ərazilərimizdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması, habelə təhlükəsiz yaşayışın, səmərəli fəaliyyətin və rifahın davamlı artmasının dəstəklənməsi məqsədilə yaradılmış Qarabağ Dirçəliş Fonduna 300 min manat məbləğində ianə edib. 
Qeyd edək ki, “AS Group” şirkəti dövlətimizin 44 gün ərzində Qarabağın azadlığı uğrunda apardığı Vətən Müharibəsində canlarından keçən və yaralanan qəhrəmanlarımızın ailələrinə dəstək olmaq məqsədilə “Yaşat Fondu”na da 150 min manat məbləğində dəstək olmuşdu.
“AS Group” həmçinin İkinci Qarabağ Müharibəsi başladığı gündən ön cəbhədə döyüşən əsgərlərimizə və müharibə ərzində düşmən zərbələri nəticəsində evləri dağıdılan, başqa kəndlərə, qəsəbələrə yerləşdirilən vətəndaşlarımıza ərzaq təhcizatı ilə dəstək olmaqla yanaşı, öz balansındakı texnikasını ordumuz üçün səfərbər etmişdi.
Müharibə gedən dövr ərzində şirkət eləcə də, əməkdaşları arasında “Əsgərimə qanım fəda!” adlı qanvermə aksiyası keçirərək yığılan qanla döyüşlərdə yaralanan qəhrəman əsgərlərimizə dəstək olmuşdu.   
Ölkəmiz Vətən Müharibəsinə başladığı gündən rəşadətli ordumuza dəstək olmağa çalışan “AS Group” şirkəti qələbəmizdən sonra da işğaldan azad edilən rayonlarımızda: Füzuli, Hadrut və Zəngilanda hərbi hissələrimizin əsgərlərinə sovqat olaraq isti geyimlər, qida və generatorlar hədiyyə etmişdi.
Bundan başqa “AS Group” şirkəti cəbhədə döyüşən və şəhid olan əməkdaşlarının ailələrinə, eləcə də digər şəhid ailələrinə maddi və mənəvi dəstək olmağa çalışır. Şirkət bütün bunları özünün Vətənimiz, dövlətimiz və cəmiyyətimiz qarşısındakı sosial məsuliyyəti və mənəvi borcu hesab edir!
Vetenim-Azərbaycandir.az Qafqazinfo ya istinadən