SON DƏQİQƏ

16 dekabr 2022-ci il tarixdə “Akaremkitab” kitab evində müəlliflərinin t.ü.f.d. Əlisgəndər Salamov və f.ü.f.d., dosent Oktay Salamovun olduğu “Günəş enerjisindən istifadə” adlı elmi-populyar kitabın təqdimatına həsr olunmuş tədbir keçirilib. Tədbirdə Azərbaycan Elm və Təhsil Nazirliyinin Radiasiya Problemləri İnstitutunun icraçı direktoru f.ü.f.d., dosent Rəvan Mehdiyeva, AzMİU-nin “Ekologiya” kafedrasının professoru, t.e.d. Fuad Hacızadə, Azərbaycan Dəniz Akademiyasında “Mexanika kafedrası”nın müdiri, t.e.d., prof. Vaqif Həsənov, Radiasiya Problemləri İnstitutunun “Bərpa olunan enerji növlərinin çevrilməsi laboratoriyası”nın rəhbəri, f.ü.e.d., dos. Mətanət Mehrabova, həmin institutun elmi katibi f.ü.f.d., dos. Musa Nuriyev, “Azalternativenerji MMC”-nin məsul işçisi Rasim Məmmədov, həmiçinin də Radiasiya Problemləri İnstitutunun əməkdaşları iştirak etmişlər. 
Tədbiri giriş sözü ilə dosent R. Mehdiyeva açaraq, ənənəvi yanacaq növlərinin, o cümlədən də neft, qaz, daş kömür kimi əsas yanacaq növlərinin tükənəcəyi və bu yanacaq növlərindən istifadə zamanı yaranan ekoloji problemlər barədə məlumatlar verərək, bu baxımdan, gələcək nəsillərin dayanaqlı şəkildə enerji təminatı, həmçinin ətraf mühitin qorunması məqsədilə, Alternativ və Bərpa Olunan Enerji Mənbələrinin  müxtəlif növlərindən istifadənin böyük əhəmiyyət kəsb etdiyini bildirmişdir. Daha sonra o kitabın müəllifləri barədə tədbir iştirakçılarına məlumat vermiş, kitabın hazırki halda nə qədər böyük əhəmiyyət kəsb etdiyini bildirmişdir.
Çıxış üçün ilk söz kitabın həmmüəllifi olan dosent Oktay Salamova verilmişdir. O.Salamov kitabın yazılmasının zəruriliyi, Bərpa Olunan Enerji Mənbələrinin mövcud növləri və onlardan Azərbaycan üçün də xüsusi əhəmiyyət kəsb edənlər barədə məlumatlar verərək, nə üçün ilk olaraq Günəş enerjisindən istifadəyə aid kitab yazdıqlarını açıqlamışdır. Daha sonra O.Salamov kitabda oxuculara təqdim olunan materiallar barədə ərtaflı məlumatlar vermiş və günəş enerjisindən istifadənin müxtəlif yollarını ətraflı şəkildə izah etmişdir.
Kitabın ərəsəyə gəlməsinin zərurliyi barədə bir qədər fərqli və dəyərli məlumatları digər həmmüəllif olan Ə.Salamov çox ətraflı şəkildə izah etmiş və tədbir iştirakçılarında kitaba qarşı böyük maraq yaratmışdır. O hazırki kitabın daha öncə Azərbaycan alimləri tərəfindən yazılmış analoji kitablardan fərqli və üstün cəhətlərini izah etmiş və kitabın nə üçün geniş auditoriyaya hesablandığının zəruriliyi barədə ətraflı açıqlamalar vermişdir.
Daha sonra fəxri qonaq qismində dəvət olunmuş R.Məmmədov çıxış edərək “Azalternativenerji MMC” tərəfindən ölkəmizin müxtəlif ərazilərində quraşdırılmış günəş və külək energetik qurğuları, həmçinin də Qobustanda quraşdırılmış bioqaz qurğusu barədə məlumatlar vermişdir.
Çıxış üçün söz tədbirə fəxri qonaq kimi dəvət olunmuş prof. F.Hacızadəyə və prof. V.Həsənova verilmiş, onların da hər biri təqdimatı keçirilən kitabın hazırki dövr üçün kəsb etdiyi əhəmiyyətdən danışmışlar və bu barədə öz müsbət rəylərini bildirmişlər.
Tədbirin sonunda bütün tədbir iştirakşılarına müəlliflər tərəfindən kitablar hədiyyə edilmişdir.




VETENİM-AZERBAYCANDIR.AZ